Masasalamin sa antolohiyang ito ang samu't saring paksang pinagtutuunan ng isip ng mga kwentista ng bagong henerasyon. May nagbabalik sa nakalipas at nagpupumilit makahanap ng tugon sa mga pag-aalinlangan sa kasalukuyan at sa hinaharap. Mayroon ding tumatalon nang kung ilang siglo tungo sa kinabukasan, siguro'y bilang babala sa kahihinatnan ng lahat ng makabagong paglalaro sa teknolohiya at karunungan. At mayroon ding humahalukay sa mga simple at pang-araw-araw na alalahanin sa buhay ngayon, sa hangarin marahil na palalimin ang mga mabababaw at pababawin ang mga malalalim. Pangkista ka man, aktibista, bakla, pintor, o performance artist kaya, marunong ka mang magpalipad ng saranggola o hindi, may kwento rito tungkol sa 'yo. Dahil ito'y tungkol sa buhay nating mga Filipino kahapon, ngayon, at bukas. Mes de Guzman - Estudyante ng Malikhaing Pagsulat sa UP Diliman. Edad 18 siya nang magkasunod niyang napagwagian ang unang gantimpala sa Gantimpalang Ani at grand prize sa Likhaan. Ang kanyang mga sanaysay, video, iskrip, at kwento'y nagsipagwagi ng gantimpala mula sa GAwad Ka Amado, Diaryo Filipino, NCCA-MOWELFUND, CCP, UP-Viva Scriptwriting Contest, at Palanca. Nahirang siyang Local Fellow for Fiction ng UP Creative Writing Center noong 1994. V.E. Carmelo D. Nadera Jr. - Katatapos lang ng MA Psychology nang may karangalan sa UST, si Vim ang unang nangahas gumamit ng Poetry Therapy sa mga may kanser. Noong 1996 din siya nanalo sa Gantimpalang Collantes (tula at sanaysay) at Rizal International Poetry Contest. Nagtuturo siya ng Performance Poetry at ng Ideya at Estilo sa UP. Siya ang 1997 local fellow para sa tula ng UP Creative Writing Center. Editor siya ng TELON Newsposter ng Dramatic Arts Committee ng NCCA.

Quick Jump:
by Author  •  by Publisher  •  by Category

Still can't find the book you want? If the book you want is not yet listed in our online catalog, write us now about your special order. If it exists, we will find it!